ماما

ماما احلي كلمه سمعتها في حياتي لما نادين بتقولها زي ما يكون بتقولي كل حاجه حلوه في الدنيا بتقولي بحبك وانتي اماني وانتي كل اللي انا اعرفه في الدنيا دي حتي لما بتسيبني ساعتين وتبعد عني بتوحشني كلمه ماما يارب ما تحرمني منها . اول مره شوفت نادين بالسونار كانت لسه مش باين ملامح لاي شئ بس تاني مره شاورتلي عملتلي "باي" والله عملت كده فعلا مرحلة الحمل بشكل عام كانت سلسه فيها شويه تعب مش هانكر لكن ده طبيعي عند اي حد مش لاني معاقه بالعكس ولله الحمد انا كنت حاسه اني احسن من ناس كتير مش معاقين اصل احنا مشكلة مجتمعنا انه دايمابياخد بالشكل الظاهري لكن في ناس كتير اوي مش باين عليها اي حاجه بس من اقل شئ ممكن تقع من طولها بس لو المعاق جت تحت رجله حتةمن الاسفلت مش مستويه ووقع يبقي هو اللي غلطان مش اللي عمل الاسفلت مش مظبوط هو اللي غلطان . خرجت نادين للدنيا اللي ان شاء هاتبقي حلوه وجميله بس انا حصلتلي حاجه عجيبه انا من اول ما شوفت نادين وعلي اد فرحتي بيها اللي لا يمكن حد يقدرها علي اد خوفي عليها انا كنت خايفه اوي اني مااقدرش اعمل لنادين حاجات كتيره او انها تتعب في يوم وما اقدرش اروح بيها للدكتور واكبر مخاوفي يا تري لما تكبر ممكن تبقي متضايقه لان امها معاقه . لكن الاشياء الماديه دي لينا معاها وقفات وازاي اتغلبت عليها لان الحاجه ام الاختراع لدرجة انه كتير من الاسوياء اتعلموها مني . اما نظرتها ليا وهل ممكن يكون ليها وجة نظر كده ولا كده انا ممكن اقطعها بسبب ده بس ربنا سبحانه وتعالي عنده القانون " والذين آمنوا واتبعتهم ذريتهم بإيمان الحقنا بهم ذريتهم وما التناهم من عملهم من شئ كل امرئ بما كسب رهين" صدق الله العظيم