الفكره

هو انا ليه فكرت في التدوين دلوقتي ؟ وليه اخترت العنوان ده للمدونه بتاعتي ؟ طب هل يا تري العنوان هايكون فعلا يوميات نادين وماما ؟ شويه حاجات كده بفكر فيها بس هو الموضوع اني من زمااااااااااااااااان وانا بكتب خواطر وعمري ما فكرت انشرها بس انا في الوقت الحاضر بعيش مرحله مختلفه من حياتي وهي اني بقيت ماما يمكن انا اتأخرت شويه في اني ادون كل مرحله من مراحل الامومه لانها بدأت حتي من قبل ما اشوفها اما بالنسبه للعنوان هي مش هاتكون يوميات نادين وماما اكتر ما هاتكون مواقفي مع الحياه من وجهة نظري كماما لنادين لاني في الفتره الاخير بقيت بتكسف اقول للناس اسمي وبقيت بقول ام نادين حسيت انه نادين بتعملي حاجات كتير اوي في حياتي بالرغم من انه عمرها يادوب سنه وكام شهر وما بتعرف تقول غير كلمتين بس صح "بابا وماما" بس بتعمل احلي حاجه في الدنيا بتدخل الفرحه والبهجه والسرور في حياتنا انا عاوزه اقول حاجه اخيره يمكن ناس قريبه مني تفتكر انه المدونه بالفكره دي ممكن تثير شجون ناس ربنا ما رزقهم بنعمه الامومه او حتي بالزواج من اصله بس صدقوني انا فكرت فيها لشئ تاني خالص انا ام معاقه لطفله والحمد لله سليمه وفي منتهي الشقاوه وفي ناس كتير اوي بتفتكر انه البنت المعاقه ما ينفعش تتجوز يارب اقدر اوصل اللي نفسي فيه